Ассалау!!!

Аллам  саған  бас  ұрдым  ғой,

Алдында  құдіретіңнің  жасырдым  бой.

Танымай  қалдың  білем,

                                          мен  кәдімгі,

Өзіңнің  сүйген  құлың  Қасыммын  ғой.

 

Ғанибет  жер  бетінен  Сізді  көрген,

Жүздесіп  кетпекпісіз  ізгілермен.

Жасадым  біраз  өмір,

                                    ойыңызда

Жоқпа  еді  алып  кету  бізді  жерден.

 

-Хал  жағдай?

-Құзырыңыз  құп  болуда,

Сүймеген  құлдарыңа  құт  қонуда.

Қанат  бар  періште  мен  сайтаныңда,

Мен  болсам  жаяу  келем  құс  жолында.

 

-Әйел  ме?

-Ажырасқам,  алжығанда,

Сенімсіз  серттен  міне  тайдым  Алла.

-Балалар?

-Өсіп  кеткен,  кім  біледі

Табынып  жүргендерін  қай  құдайға.

 

-Уақыт  тар?

      Боп  қалды  ма  ғасыр  ада.

Алла  да  әлде  қайда  асыға  ма?

Жұмағыңа  жолдама  сұрамайын,

Автограф  берсеңіз  ашынама.

 

 

              ***

 

Жаралғаннан  шоқ  басып,  ант  аттағам,

Өгей  болды  мен  үшін  жалпақ  ғалам.

Жетесізге  жетіспей  мейірімің,

Жұмақтан  да  қуылып  жан  сақтағам.

 

Жарлығыңнан  жүрекке  тарап  қаным,

Қай  пиғылмен  сомдадың  жаратқаным.

Бесігінен  баз  кешкен  бейбағыңды,

Азулыға  жөн бе  еді  талатқаның.

 

Сіркесі  су  көтермес  саяғы  да,

Жармасады  битің  де  балағыма.

Шарлап  шексіз  ғаламды,

                                           сүлдерімді

Сүйреп  келіп  жығылдым  аяғыңа.

 

Көп  іздедім  түнектен,  көрінбедің,

Зағип  қылдың  соншама  көңіл  көзін.

Жалбарындым,

                   -  Жәрдем  бер  жаббар  ием,

Қалай  іздеп  табайын  өзімді  өзім.

 

Мәртебелі  ұлыңмын,

                                      қолбалаңмын,

Тепкісінен  тағдырдың  қорғамадың.

Жырынды  боп  жете  ме  жаһаннамға,

Өзің  сүйіп  сезімнен  сомдағаның.

 

...Жаратқаным  сұқ  көзін  қадады  да,

Тұрды  үнсіз  үніліп  жанарыма.

Мені  жегідей  жеген  сұрақтардың,

Өзі  дағы  сөз  таппай  жауабына.