Төбемнен  төніп  қара  түн  ғаламды  басқан,

Үңіліп  түнге  мен  емес  жаңалық  ашқан.

 Жұлдызды  жиһан  тұрады  тоқсан  бес  пайыз,

ҚАРАҢҒЫ  ҚУАТ,

                         және  де   ҚАРАҢҒЫ  ЗАТТАН.

 

Тақтағы  ханның  төрі  тар,

                                          таптағы  бидің,

Жиренше  сыйған  шебіне  шап – шағын  үйдің.

Тылсымы  түпсіз  түйсіктің,

Тоқсан  бес  пайыз

Қараңғы  заттан  тұрады  қатпары  мыйдың.

 

Түнектен  басқа  жиһанда  түк  қалмады  да,

/Беймаза  біздің  тіршілік  түс  болғаны  ма?/

Тәңірдің  сана- сезімі,

                                 күш – қуаты  да,

Қараңғы  заттан  тарайды

                                       ҚҰСЖОЛДАРЫНА.

 

Біз  тіпті  зат  та  емеспіз

                                    сынап  қараңыз,

Түйіршік  те  емес,

                         сезілмес  қуат  қанамыз.

Өлгеннен  соң  да  енеміз  қараңғылыққа,

Тозаққа  да  біз  бармаймыз

                                     жұмаққа  да  біз.