Коммерция – сауданың  заманында,

Ақша  тауып  ай,  күннің  аманында,

Байлығыңды  еселеп  өсірерсің,

Саудаласып  өмірдің  базарында.

 

Іске  асырып  қайдағы  жоспарыңды,

Бұзып  жарып  торғауыт,

                                        тосқауылды,

Жоғалтып  та  аларсың  абайсызда,

Жақыныңды,

                 жарыңды,

                              достарыңды.

 

Пенде  емессің  білемін  жанын  баққан,

От  пен  суға  кірерсің  тайынбастан.

Сәті  түсіп  тұрғанда, 

                                   көзді  жұмып

«Жоқты»  «бар»ға  аларсың  айырбастап.

 

Өсиетім  ең  соңғы, 

                            алғашқым  да,

Болсаң  менің  жолымды  жалғастырмақ,

Аманат  қып  қалдырған  Отанымды,

Саудалама!

           Жоғалтпа!

                   Алмастырма!

 

                   

 

        ***

 

Оранып  салқам  сағымға,

Жолдарын  кешіп  жорықтың.

Шау  тартқан  мынау  шағымда,

Анаңа  сенің  жолықтым.

 

Өмірде  кім  жоқ  шерменде,

Әлемнің  шарлап  аймағын,

Алпыс  бес  жасқа  келгенде,

Өзіңді  таптым  Айбарым.

 

Еркелеп  ер  жет,  құлыным,

Мазасын  кетір  әр  кештің.

Диананың  жұлқып  бұрымын,

Жүйкесін  жыртып  Зәурештің.

 

Тартынба,

                 ойна,

                        күлімде,

Арманға  тіре  ат  басын.

Қақпаймын  беттен  тірімде,

Бес  жасқа  дейін  патшасың.

 

Тезіне  салып  ел  сені,

Ертең  ақ  өмір  шыңдайды.

Өтеді  ептеп  еркелік,

«Патшалық»  баста  тұрмайды.

 

Ер  жетіп,  өсіп,  тола  ғой,

Балалық  шақты  тәмамдап.

Анаңның  құлы  бола  ғой,

Құл  болма  бірақ  адамға.

 

Кетірме  суға  салыңды,

Адал  еңбекті  бақ  сана.

Саудаға  салма  арыңды,

Құл  бола  көрме  ақшаға.

 

Жау  іздеп  жерден  терлеме,

Досыңды  сатпа,

                            алдама

Табынба  тірі  пендеге.

Табынсаң  табын  Аллаға,

 

Жететін  жерден  күншілік,

Жақсыға  болшы  шабарман.

Әлемде  мынау  тіршілік,

Жақсылық  үшін   жаралған