Алжасқан  мынау  көктемде,

Адасып  маусым  кеткен  бе?

Сәуірге  симай  қар  жатыр,

Қар  жатыр  симай  бөктерге...

      Әлде  бұл  сенің,  аяулым,

      Айтылмай  жүрген  өкпең  бе?

 

Бұталар  бөгіп  қырауға,

Көбікке  толып  тұр  аула.

Шыт  көйлек  киген  қыз-көктем,

Тап  болды  тосын  тымауға...

       Әлде  бұл,  қалқам,  қапыда,

       Шашыңа  түскен  қылау  ма?

 

Енгізіп  заңға  жаңа  бап,

Қарменен  жонды  сабалап,

Қырсық  қыс  қайта  оралып,

Көктемді  жатыр  табалап...

       Әлде  бұл  күзде  кірлеген,

       Көңілді  жүр  ме  тазалап?

 

Аралап  аяз  жыраны,

Үсіді  талдың  құлағы.

Қар  атып  жүрген  құрдастар,

Құтырмай  текке  құры  әрі!

       Табиғат  естен  ауысса,

       Мен  емеспіп  ғой  кінәлі.