Даланың  жыры --

Қырандар  қанатынан  қайрылған

              Дауылдар  туралы  жыр.

Тым  ерте  жастығынан  айрылған

               Арулар  туралы  жыр.

 

Даланың  жыры –

Күні  жоқ  қан  түсіне  боянбаған

                Бесіндер  туралы  жыр.

Махаббат  уызына  тоя  алмаған,

                 Жесірлер  туралы  жыр.

 

Даланың  жыры –

Аңыз  бен  ақиқатқа  куә  қылған,

                  Ертектер  туралы  жыр.

Намысы  қызыл  қанға  суарылған

                  Еркектер  туралы  жыр.

 

Даланың  жыры –

Құлазып  қалған  жайлаулар,

                 Қоныстар  туралы  жыр.

Каторгалар  мен  айдаулар,

                 Соғыстар  туралы  жыр.

 

Даланың  жыры –

Дананың  жыры,

                   Шапағат  туралы  жыр.

Даланың  жыры –

Ананың  жыры

                    Махаббат  туралы  жыр.

 

Даланың  жыры –

Ғасырлар  жиһанкезі - көштер,

                     Ғұламалар  туралы  жыр.

Бухенвальдтағы  крематори –пештер,

                    Құмдағы  мұнаралар туралы  жыр.

 

Даланың  жыры –

Дәуірдің   әсемдік  дархан  үні,

                         Әйел  туралы  жыр,

Жалғасып  жатқан  Ұлы  қан  тамыры,

                    Әлем  туралы  жыр!