( «Жұлдыз»  би  ансамбілі  жүлдегер  атанды)

 

Тәубе  қылып  бір  ауыр  жыл  өткенге,

Қоғам  жүдеп  жүргенде,

                                          жүдеп  пенде,

Шашыраған  шуақтай  жұлдызшалар,

Нұрын  төкті  жаураған  жүректерге.

 

Жоймаса  да  жоқтықты  түбірімен,

Жанбаса  да  көгінде  күні  кілең.

Даурығысып  қалды  бір  дүйім  халық,

Биші  балапандардың  дүбірінен.

 

Туысың  да  қол  соғып,

                                          танысың  да,

Сендер  жүрсің  бір  елдің  намысында.

«Жұлдыз»  биге  шыққанда  дүрлігеміз,

Теміртаудың  түскендей  бәрі  сынға.

 

Кейіпіне  еніп бір  жас  баланың,

Желпінесің  тұрғандай  баста  бағың.

Көкке  жетті  төбеміз  «Жұлдыз»  биі,

Көрінгенде  төрінен  Астананың.

 

 

Қуаныштан  кірпікке  жас  ілініп,

Жалын  жатты  жанарда  жасырынып.

Көрік  кеуде  боп  алдық  сендер  үшін,

Өшпесін  деп  өнерге  ғашық  үміт.

 

Ертең  елдің  ер  жетіп  болашағы,

Ертең  тағы  тойлаймыз  тамашаны.

Сахнаның  төрінде  Жұлдыз  жанып,

Сахнаның  төрінен  таң  атады.

 

Күні  ертең-ақ  жаңғырып  көне  дүбір,

Жұлдызшалар  көгімде  өреді  кіл.

Өсер  елдің  ұрпағы,

                                   сендер  үшін,

Тәңірге  де  табынғым  келеді  бір.