Теңдік  қолға  тиген  соң  талғам  үдеп,

Әйелдердің  бүгінде  арманы  көп.

Кінәлайды  біздерді

                                –«Еркектерде,

Серіліктен  түйіршік  қалмады» - деп.

 

Жалған  сенім,

                       шара  жоқ  түземеске,

Сері  сезім  қашанда  жүреді  есте.

Айды  әкеліп  аспаннан  бермесек  те,

«Айым» - деп  ат  қоятын  біз  емеспе?

 

Сендер  үшін  мың  ерлік  дайындаймыз,

Алдымыздан  жолығып  қайыңдай  қыз,

Жылы  ғана  жымиса,

                                        ажал  түгіл,

ЗАГС-ке  де  барудан  тайынбаймыз.

 

Сендер  барда  түкке  де  торықпаймыз,

Семьяның  мүшесін  толықтаймыз.

Сендер  үшін  той  сайын  тост  көтеріп,

Айытқышқа  түсуден  қорықпаймыз.

 

Өздеріңе  тапсырып  өзге  міндет,

Түске  дейін  ұйықтадық, 

                                        өлгеміз  жоқ.

Азық-түлік  тасуға  болмағанмен,

Қойған  асты  қайтарып  көргеміз  жоқ.

 

Біз  шыдаған  ерлікке  қорған  шыдар,

Сендер  үшін  періште  жолдан   шығар.

Қамал   бұзған  шағымыз  болмағанмен,

Қазан  бұзған  шағымыз  болған  шығар.

 

Қарамаңдар  құрбылар  сынай  тағы,

Жанарларың  жанымды  мұңайтады.

Сендер  үшін  сонша  жүк  арқалаған,

Бізді  СЕРІ  емес  деп  кім   айтады.