Кесіліп  қалқан  құлағым,

Құлдыққа  салдың,  шыдадым,

             Маңдайдың  соры  бес  елі.

Бостандық  келді  сен  берген,

Шықпады  бірақ  зердемнен,

             Құдайдың  құлы  екенім.

 

Байлықпен  сынап  байқадың,

Ақшаңды  шаштым,  шайқадым,

          Коммерсантарға  тоналдым.

Теңгенің  құнын  танымай,

Сіңірі  шыққан  жабыдай,

           Қайыршы  болып  оралдым.

 

Жарылып  кете  жаздаған,

Атақ  та  бердің  аздаған.

            Аунадым  сыйдың  төрінде.

Баянсыз  болып  бәрі  де,

Тұмандай  таңғы  сәріде,

              Сәскеге  жетпей  сейілді.

 

Датталып,  бірде,  ақталып,

 Үні  өшіп,  ділі  сақталып,

              Ұлыған  айға  көк  бөрі.

Кең  қылып,  кейде,  тар  қылып,

Сарсаңға  салған  Тағдырым,

               Емеспін  саған  өкпелі.

 

 

      ***

 

Ғаламды  сілкіп  қалсам  не  болады,

Жұлдыздар  тым-тырақай  жоғалады.

Жаһаннамға  жолдайтын  жан  табылмай,

Әзірейіл  жұмысын  доғарады.

 

Болмады  деп  бірінші  болжағаны,

Жаппар  ием,  жеті  күн  толғанады.

Топырақтан  торқалы  қамыр  илеп,.

Адам,  Хауа  қайтадан  сомдалады.